Abo kwibuka

IGISOMWA CA MBERE

Ivyo dusoma mu gitabu c’Ihunguka (23, 20-23)

Umumarayika murinzi

Muri irya misi, Umukama yabariye Musa ati: «Nza kurungika umumarayika imbere yawe, akuzigame mu nzira, agushikane aho naguteguriye ikibanza. Uze umwubahe, umwumvirize, ntihagire aho umwankira, kuko yokwanka kukurekurira ubugaba bwawe, kuko izina ryanje riri muri we. Mugabo rero, niwamwumvira vy’ukuri, ugakora ivyo azokubwira vyose, nanje nzoba umwansi w’abansi bawe, ndwanye abakurwanya. Umumarayika wanje azokuja imbere.»

IZABURI 90 (91) 1-2, 3-4, 5-6, 10-11

Icit.:  Umukama yabwirije abamarayika biwe
          ngo baguhagarikire mu rugendo rwawe rwose.

Iyo nkingiwe n’inkinzo y’uwuhangamye mw’ijuru,
nkibera mw’irebe ry’Umushoboravyose,
ndibuka Umukama ari we mahungiro n’amirukiro yanje,
Imana yanje nizeye.

Nka ko, ni we azogukiza umutego w’umutezi,
agukize n’ikibi c’urujanyi;
ni we azogukingira ikibaba,
akubere amahungiro y’ukuri.

Si ijoro ry’agatunguramutima,
si umwampi wirasa ku murango,
si akaranda gatema gatongora mu mwijima,
si akavuna ko mu mashoka,
muri ivyo vyose nta co uzotinya.

Nta kabi kazokugobako,
nta muvumo uzogera mu nzu yawe;
na none yabwirije abamarayika biwe
ngo baguhagarikire mu rugendo rwawe rwose.

INKURU NZIZA

Aleluya, aleluya.

Nimuninahaze Umukama, mwa biremwa vy’ijuru vyose,
muhora murangura ico ashaka!

Aleluya.

Ivyo dusoma mu Nkuru nziza ya Yezu Kristu nk’uko yashikirijwe na Matayo (18, 1-5. 10)

Muri irya misi, abigishwa begereye Yezu bamubarira bati: «Umukuru mu Bwami bw’ijuru ni nde?» Yezu yakuye akana agashira hagati yabo ati: «Ndababwiye, ni ivy’ukuri: mudahindutse ngo mube nk’abana batoyi, ntimuzokwinjira mu Bwami bw’ijuru. Uwuzokwicisha bugufi akamera nk’aka kana, ni we asumba abandi mu Bwami bw’ijuru. Uwufata neza ku bwanje akana nk’aka, ni jewe aba afashe neza.
Murazi umuziro, ntihagire na kamwe mukengera muri utu twana, kuko, ndabibabariye, abamarayika babo bama imbere ya Data wo mw’ijuru bamwihweza.